Mariing itinanggi ni Senator Ronald “Bato” Dela Rosa ang anumang natatanggap niyang opisyal na abiso mula sa International Criminal Court (ICC) kaugnay sa umano’y bantang pag-aresto laban sa kanya. Sa halip, tinawag niyang isang “diversionary tactic” lamang ang isyu upang ilihis ang atensyon ng publiko mula sa mga kontrobersyang kinakaharap ng kasalukuyang administrasyon—lalo na ng First Lady na si Marie Louise “Liza” Araneta-Marcos.
Sa isang panayam, inilahad ni Sen. Dela Rosa ang kanyang saloobin ukol sa lumalaganap na ulat na may nakabinbing warrant of arrest mula sa ICC. Ayon sa kanya, “parang timing na timing” umano ang isyu, kaya’t pinaniniwalaan niyang layon lang nitong mapagtakpan ang mas malalaking isyu.
“Kung may warrant, edi dakpin ako. Hindi ko kailangang mag-voluntary surrender,” matapang niyang pahayag sa isang panayam na tila hinahamon pa ang ICC at mga kinauukulan.
Matatandaang isa si Dela Rosa sa mga itinuturong posibleng co-perpetrator sa reklamong isinampa ng ICC laban kay dating Pangulong Rodrigo Duterte, kaugnay ng kontrobersyal na kampanya kontra droga. Bilang dating PNP Chief na siyang nanguna sa pagpapatupad ng “Oplan Tokhang,” naka-focus sa kanya ang mata ng mga tagasuri ng ICC.
Samantala, nilinaw ng Malacañang na hanggang ngayon ay wala pa silang natatanggap na anumang opisyal na komunikasyon mula sa ICC hinggil sa isyu. Ayon kay Executive Secretary Lucas Bersamin, bagama’t posible raw ang pag-aresto sakaling may ilabas na warrant, ay wala pa namang pormal na anunsyo o dokumento mula sa international court.
“Kapag may warrant of arrest ang ICC, theoretically, pwede siyang dakpin. Pero sa ngayon, wala pa kaming natatanggap na komunikasyon,” ani Bersamin.
Ayon sa mga eksperto, hindi awtomatikong kikilos ang Philippine government kung walang opisyal na kooperasyon sa ICC, lalo’t umatras na ang Pilipinas sa kasunduan nito noong panahon ni Duterte. Gayunpaman, nananatiling bukas ang posibilidad ng pagkilos ng international bodies kung mapatunayang may sapat na batayan.
Ang umano’y “diversionary tactic” na sinasabi ni Dela Rosa ay tumutukoy sa lumalalang isyu na kinakaharap ng unang ginang, na kinabibilangan ng mga alegasyon ng pakikialam sa mga usaping pampulitika at pamahalaan.
Be First to Comment