Umiinit ang bangayan sa pagitan ni Pangalawang Pangulo Sara Duterte at Senadora Risa Hontiveros matapos ang pagbubunyag ni alyas “Rene” na nagsasabing kasama niya umano ang ilang testigo ng International Criminal Court (ICC) sa isang safe house na pinatatakbo ni Sen. Hontiveros.
Ayon kay Vice President Sara Duterte, nabasa na niya ang affidavit ni alyas Rene bago pa ito naiulat sa publiko. Nakasaad umano rito na si Rene ay pinatira sa isang lugar na pag-aari o pinangangalagaan ni Sen. Hontiveros, kasama ang ilan pang testigong sangkot sa ICC investigation kaugnay ng kontrobersyal na war on drugs sa ilalim ng administrasyon ni dating Pangulong Rodrigo Duterte.
“Ito ay seryosong paratang na hindi dapat binabalewala. Kung may mga kasinungalingang naganap sa ilalim ng sinumpaang salaysay ni Rene, dapat niya itong isampa sa korte,” pahayag ni VP Sara sa isang panayam.
Samantala, mariing pinabulaanan ni Senadora Hontiveros ang mga paratang. Tinawag niya ang mga pahayag ni Rene na “fake news” at bahagi umano ng isang malawakang plano para sirain ang kanyang pangalan at gawing hindi kapani-paniwala ang mga testigo sa ICC. Iginiit din ng senadora na may kasong cyber libel na siyang isinampa laban kay Rene at sa ilang social media personalities na nagpakalat ng nasabing video.
“Ang ganitong klaseng pananakot at pagsasangkot sa mga testigo ay malinaw na witness tampering,” giit ni Hontiveros. “Hindi ito makatarungan at kailangang managot ang mga nasa likod nito.”
Dagdag pa ng senadora, nagsampa na rin siya ng reklamo sa National Bureau of Investigation (NBI) upang imbestigahan ang Facebook page na “Pagtanggol Valiente,” kung saan unang lumabas ang video ni Rene, at iba pang sangkot sa pagpapalaganap nito.
Isa pa sa kinuwestiyon ni Hontiveros ay kung paanong napunta kay VP Sara ang kopya ng affidavit ni Rene bago ito mailabas sa publiko. Para sa kanya, ito’y patunay na may mga makapangyarihang puwersang nasa likod ng pagpapalit ng salaysay ni Rene at posibleng pinipilit itong gamitin laban sa kanya.
Si alyas Rene ay isa sa mga unang lumutang na testigo laban kay Pastor Apollo Quiboloy at sa pamilya Duterte, ngunit kamakailan lamang ay binawi ang kanyang mga naunang pahayag. Ayon sa kanya, pinilit at binayaran lamang siya para magbigay ng testimonya sa mga hearing sa Senado.
Sa kasalukuyan, hinihintay ng publiko kung magsasampa nga ba ng pormal na reklamo si Rene para tuluyang mailitaw ang katotohanan sa likod ng kanyang magkakasalungat na testimonya. Samantala, nagpapatuloy ang imbestigasyon at legal na proseso upang alamin kung may pananagutan nga ba sina VP Sara, Sen. Hontiveros, at iba pang sangkot sa usapin.
Be First to Comment