Sinuspinde nang walang takdang panahon at pinagmulta ng ₱100,000 si dating PBA star Arwind Santos matapos ang kanyang marahas na aksyon laban kay Tonton Bringas sa Game 2 ng South Division quarterfinals ng Maharlika Pilipinas Basketball League (MPBL).
Nangyari ang insidente sa ika-apat na kwarto ng laban sa pagitan ng Basilan Starhorse at GenSan Warriors nang biglang suntukin ni Santos sa mukha si Bringas. Tumama ito sa may bahagi ng kaliwang mata ng huli, na nagdulot ng sugat at kaunting pagdurugo.
Agad na itinuring ng mga opisyal ang insidente bilang disqualifying foul, at pinatalsik si Santos sa laro. Kasunod nito, naglabas ng pahayag ang MPBL management na mahigpit nilang kinokondena ang anumang uri ng karahasang pisikal sa loob ng liga, lalo na sa panahon ng playoffs.
“The league will not tolerate such actions. Sportsmanship must always prevail,” ayon sa opisyal na pahayag ng MPBL.
Samantala, nagpahayag naman ang Basilan team management ng respeto sa desisyon ng liga ngunit hiniling din na muling suriin ang insidente. Ayon sa kanila, ilang beses umanong nagpakita ng “unsportsmanlike behavior” si Bringas bago pa naganap ang suntukan, na maaaring naka-provoke kay Santos.
Sa ngayon, mananatiling indefinite ang suspensyon ni Santos hanggang sa matapos ang imbestigasyon at matukoy kung kailan siya muling papayagang maglaro.
Ang insidente ay nagdulot ng matinding reaksyon mula sa mga tagahanga at sa basketball community, lalo na’t si Santos ay kilalang beteranong manlalaro at dating MVP sa PBA. Marami ang umaasang magsisilbi itong babala sa ibang manlalaro na pairalin pa rin ang disiplina at respeto sa loob ng court.
Be First to Comment