Isang malakas na lindol na may lakas na magnitude 6.9 ang yumanig sa lalawigan ng Cebu noong Setyembre 30, 2025, na nagdulot ng matinding pagkabahala at pinsala sa iba’t ibang bayan at lungsod sa hilagang bahagi ng probinsya. Ayon sa Philippine Institute of Volcanology and Seismology (PHIVOLCS), natukoy ang epicenter ng lindol sa layong 17 kilometro hilaga-silangan ng Bogo City.
Pinakaapektado ang mga bayan ng Bogo, San Remigio, Daanbantayan, Medellin, at Tabuelan kung saan maraming kabahayan at gusali ang gumuho. Sa Bogo City, labing-tatlong katao ang napaulat na nasawi, kabilang ang apat na bata. Sa bayan ng San Remigio, lima ang nasawi, isa rito ay isang menor de edad na tinamaan ng bumagsak na debris. May mga naiulat ding pagkasawi sa Medellin at Tabuelan.
Sa kabuuan, tinatayang mahigit 18 hanggang 20 katao ang nasawi at higit 37 ang sugatan sa buong Cebu, batay sa pinakahuling mga ulat mula sa lokal na pamahalaan at mga pambansang ahensya. Patuloy pa rin ang search and rescue operations lalo na sa mga lugar na hirap maabot.
Samantala, nagsagawa na ng rapid assessment ang mga otoridad para matukoy ang lawak ng pinsala at ang pangangailangan ng mga residenteng apektado. Naglabas din ng abiso ang NDRRMC sa publiko na manatiling mapagmatyag at sumunod sa mga safety protocols, lalo na’t may posibilidad ng mga aftershock.
Ang insidente ay nagdulot ng takot at pagkabahala sa libu-libong Cebuano, subalit nagpapatuloy ang pagtutulungan ng mga komunidad at ahensya ng gobyerno upang mabilis na makabangon mula sa trahedyang ito.
Be First to Comment