Matapos ang mahigit apat na taon na pamamahinga mula sa professional boxing, opisyal nang inanunsyo ni Manny “Pacman” Pacquiao ang kanyang pagbabalik sa ring. Sa edad na 46, determinado ang boxing legend na muling patunayan ang kanyang husay sa darating na laban kontra sa kasalukuyang WBC welterweight champion na si Mario Barrios sa Hulyo 19 sa Las Vegas.
Sa pagbabalik ni Pacquiao sa Wild Card Boxing Club sa Los Angeles kasama ang matagal niyang trainer na si Freddie Roach, inilahad ng Pambansang Kamao na muling nabuhay ang kanyang “gutom” na makipaglaban sa entablado ng boxing.
“Ngayon na ako’y nagbabalik, muling nabuhay ang pagkauhaw ko sa laban. Miss ko na ang boxing at ang pakiramdam ng pagharap sa isang malaking laban,” pahayag ni Pacquiao.
Aminado ang kampo ni Pacquiao na mas mabagal na ang kanyang recovery time kumpara noong kabataan niya, subalit nananatili umano ang kanyang bilis at disiplina sa ensayo. Ang darating na laban ay hindi lamang pagbabalik sa boxing, kundi isang makasaysayang pagtakbo sa pagiging pinakamatandang world welterweight champion sa kasaysayan ng isport.
Gayunpaman, hindi rin nawawala ang mga agam-agam. Ilang analysts, kabilang na si Spencer Oliver ng talkSPORT, ang nagpahayag ng pag-aalala sa posibleng epekto ng edad ni Pacquiao sa kanyang kalusugan. Tinawag pa niyang “disgrace” ang laban kay Barrios, dahil hindi na umano kabilang sa top 10 rankings si Pacquiao.
Sa kabila nito, nananatiling positibo si Pacquiao at naniniwala siyang may maiiambag pa siya sa isport. Bukod sa pagbabalik-karera, layunin din niyang magsilbing inspirasyon sa mga batang boksinger sa Pilipinas at ipakita na kahit sa edad na 46, posible pa ring makipagsabayan sa mas batang henerasyon.
Ang laban kontra kay Barrios ay inaasahang isa sa mga pinakainaabangang boxing events ngayong taon. Bukod sa personal na laban ni Pacquiao para sa kanyang legasiya, ito rin ay simbolo ng muling pagbangon at determinasyon — mga katangiang matagal nang naging bahagi ng kanyang pagkatao.
Para sa marami, si Manny Pacquiao ay hindi lang isang boksingero kundi isang huwaran ng pagsusumikap, pananampalataya, at tapang.
Be First to Comment