Muling umingay ang pangalan ng dating magkasintahang sina Julia Barretto at Gerald Anderson matapos silang umano’y mamataan na magkasamang dumalo sa burol ng tiyuhin ng aktres na si Mito Barretto. Ayon sa ulat ng Abante TNT noong Setyembre 25, dumating daw ang dalawa bandang alas-siyete ng gabi at sabay ding umalis makalipas ang hatinggabi.
Nagpasiklab agad ng spekulasyon online ang naturang sightings, lalo na’t kamakailan lamang ay kinumpirma ng Star Magic at Viva Artists Agency ang kanilang paghihiwalay noong Setyembre 18. Sa parehong kumpirmasyon, nilinaw na mutual ang naging desisyon ng breakup at walang third party na sangkot, taliwas sa mga kumakalat na tsismis.
Matatandaang inamin ni Gerald na siya ang may malaking pagkukulang sa relasyon at hiniling sa publiko na huwag idawit ang ibang tao, kabilang ang volleyball star na si Vanie Gandler. Gayunpaman, tila nagbigay ng bagong kulay ang muling pagsasama nila sa pampublikong okasyon.
Sa ngayon, walang opisyal na pahayag mula sa kampo nina Julia at Gerald ukol sa tunay na estado ng kanilang relasyon. Habang naghihintay ang mga tagahanga ng malinaw na sagot, hindi pa rin maiwasan ang mga haka-haka na posibleng may “JuRald comeback” na nagaganap.
Be First to Comment