Isang dating assistant engineer ng Department of Public Works and Highways (DPWH) ang lumutang sa gitna ng kontrobersiya matapos mabunyag na natalo siya ng humigit-kumulang ₱49 milyon sa casino sa loob lamang ng tatlong buwan.
Kinilala ang opisyal na si Brice Ericson Hernandez mula sa Bulacan 1st District. Batay sa mga casino records mula sa Okada, nanalo pa siya ng ₱6 milyon noong Marso 2025, ngunit sunod-sunod na ring natalo ng malalaking halaga: ₱25 milyon noong Abril 1, ₱10 milyon noong Mayo, at ₱14 milyon noong Hunyo. Nakabawi man siya ng ₱15 milyon noong Hulyo, mas malaki pa rin ang kabuuang pagkalugi.
Sa ginanap na pagdinig sa Senado, kinuwestiyon siya ni Senador Rodante Marcoleta kung saan nanggaling ang pondong kanyang ginamit. Mariin namang itinanggi ni Hernandez ang ulat ng pagkatalo at iginiit na pumunta lamang siya sa Okada upang dumalo sa isang konbensiyon.
Gayunpaman, hindi nakumbinsi ang mga senador. Iminungkahi ni Senador Erwin Tulfo na i-cite in contempt si Hernandez dahil sa umano’y pagsisinungaling sa harap ng Senado. Agad itong sinuportahan ni Senate President Pro Tempore Jinggoy Estrada, at walang tumutol sa mosyon.
Ang insidenteng ito ay nagbukas ng mas malalim na usapin ukol sa pinagmumulan ng yaman ng ilang opisyal ng gobyerno at ang paglobo ng mga alegasyon ng katiwalian kaugnay ng mga proyekto sa DPWH. Patuloy na iniimbestigahan ng Senado ang isyu at posibleng masampahan pa ng mas mabigat na kaso ang dating opisyal.
Be First to Comment