Naglabas ang Department of Justice (DOJ) ng Immigration Lookout Bulletin Order (ILBO) laban sa negosyanteng si Charlie “Atong” Ang at aktres na si Gretchen Barretto, matapos silang pangalanan sa lumalalang imbestigasyon kaugnay sa pagkawala ng mga sabungeros noong 2021 hanggang 2022.
Kumpirmado ito ni Justice Secretary Jesus Crispin Remulla nitong Agosto 29, kung saan inatasan ang Bureau of Immigration na bantayan at iulat ang anumang pagtatangkang umalis ng bansa ng mga indibidwal na sakop ng nasabing order.
Pahayag ng Whistleblower
Ang ILBO ay inilabas kasunod ng testimonya ni Julie “Dondon” Patidongan, dating security chief ni Ang, na nagsabing si Ang umano ang utak sa pagdukot at pagpatay ng halos 100 sabungeros. Ibinunyag din niya na kabilang umano si Barretto at ilang miyembro ng tinaguriang “Alpha Group” na sangkot sa operasyon ng online sabong.
Ayon kay Patidongan, itinapon daw sa Taal Lake ang mga bangkay ng mga biktima. Dahil dito, muling nagkaroon ng imbestigasyon at nagpadala ng technical divers ang Philippine Coast Guard at Philippine Navy upang magsagawa ng paghahanap.
Pagtanggi ng mga Akusado
Mariing itinanggi nina Ang at Barretto ang mga akusasyon at naghain sila ng kani-kanilang counter-affidavit. Giit nila, walang katotohanan ang mga ibinibintang laban sa kanila.
Susunod na Hakbang
Sinabi ni Prosecutor General Richard Anthony Fadullon na inaasahang maglalabas ng mga subpoena ang piskalya sa susunod na linggo bilang bahagi ng preliminary investigation. Maaari rin umanong maghain ng Preventive Hold Departure Order (PHDO) kung mapatunayang may panganib na tumakas ang mga respondent.
Konteksto ng Kaso
Matatandaang mula 2021 hanggang unang bahagi ng 2022, higit 34 sabungeros ang naiulat na nawawala sa iba’t ibang lugar sa Luzon kabilang ang Laguna, Batangas, Bulacan, Maynila, at Rizal. Ang bagong pahayag ni Patidongan noong Hunyo 2025 ang nagbigay daan sa muling pagbubukas ng kaso at sa pagpapalakas ng imbestigasyon ng DOJ.
Be First to Comment