Pokwang, May Paalala kay Fyang Smith Matapos ang Viral na Pahayag: “Be humble, iha.”

Muling naging usap-usapan sa social media ang komedyanteng si Pokwang matapos nitong magbigay ng direktang paalala sa Pinoy Big Brother Gen 11 Big Winner na si Fyang Smith kaugnay sa isang viral video clip kung saan nagpahayag ito ng pagmamalaki sa kanilang batch.

Sa nasabing video na mula sa isang fan meeting noong Abril 6, 2025, maririnig si Fyang na nagsabi:

“Alam mo kahit ilang batch pa ‘yan, walang makakatalo sa batch namin. Hello Gen 11… Hindi, joke lang. Kaya walang makakatalo sa batch namin kasi lahat kami very genuine, very authentic…”

Bagama’t idinugtong ni Fyang na ito ay “joke lang,” marami ang nagbigay ng sari-saring opinyon sa kanyang pahayag, kabilang na si Pokwang na hindi napigilang magkomento sa Facebook post ng PEP Alerts tungkol sa isyu.

Sa kanyang komento, sinabi ni Pokwang:

“Iha, please, huwag munang magyabang, bad ‘yan… 21 years na ako sa showbiz at ang sekreto: BE HUMBLE iha, ‘yan muna ang pag-aralan…”

Dahil dito, umani ng papuri at batikos si Pokwang. May mga sumang-ayon sa kanyang payo, ngunit marami rin ang tumindig upang ipagtanggol si Fyang. Ayon sa ilang tagasuporta ng PBB Gen 11 Big Winner, ang video umano ay “cut” o pinaikli, kaya nawala ang kabuuang konteksto ng pahayag ni Fyang.

Isa sa mga netizen ang nagkomento:

“Ms. Pokwang, Fyang fans were just trying to respectfully remind you that the video you reacted to was clearly cut. It was a joke with her fans.”

Sa panig ng PEP.ph, kanilang sinuri ang buong footage ng fancon at napatunayan na ang pahayag ni Fyang ay bahagi ng mas mahabang biro at hindi intensyong magmataas.

Kaugnay nito, muling napag-usapan ang kasikatan ng Gen 11 batch ng Pinoy Big Brother. Ayon sa ulat, umabot sa 2.26 milyon ang peak live viewers ng kanilang Big Night — isang rekord na mas mataas kumpara sa Celebrity Collab Edition ng programa, na kalahati lamang ang naabot na viewership.

Sa kabila ng kontrobersiya, wala pang inilalabas na pahayag si Fyang Smith hinggil sa komentong ipinost ni Pokwang, at nananatiling tahimik ang kampo ng PBB Gen 11 hinggil sa isyu.