Hunyo 26, 2025 – Maynila — Sa isang taos-pusong mensahe, nagpaalam si McCoy de Leon sa kanyang karakter na si David Dimaguiba sa teleseryeng FPJ’s Batang Quiapo, matapos ang mahigit dalawang taong pagganap sa papel.
Ayon kay McCoy, inakala niyang ito na ang kanyang huling proyekto kaya ibinuhos niya ang lahat ng natitira sa kanya—hindi lamang bilang aktor kundi bilang isang taong tunay na nagmamahal sa sining ng pag-arte. “Bigay ko na lahat, last na ’to eh,” aniya sa kanyang post.
Ibinahagi rin niya ang mga alaala sa set—mula sa puyat, tawanan, at simpleng bonding moments, hanggang sa mga pagkakataong napapagalitan sila. Tinuring na rin umano niyang tahanan ang set ng Batang Quiapo.
Nagpasalamat si McCoy sa buong production team, mga direktor, at higit sa lahat kay Coco Martin, na tinawag niyang “utak at puso ng proyekto.”
Ayon sa kanya, si Coco ang nagbigay sa kanya ng tiwala at oportunidad na gampanan ang papel ni David.
“Hindi lang ito basta proyekto. Binago ako nito,” ani McCoy, sabay pasasalamat sa mga manonood na naantig, nainis, at napukaw ng kanyang karakter.
Sa pagtatapos ng kanyang mensahe, binigyang-diin ni McCoy ang kahalagahan ng pagbibigay ng buong puso sa bawat proyekto—na para bang ito na ang huli. “Ngayon, binibitawan ko na po ang character na si David Dimaguiba,” aniya.
Be First to Comment